పట్నా పీఠం ఎవరిది? భాజపా నేతృత్వంలోని జాతీయ ప్రజాస్వామ్య కూటమి అధికారం నిలబెట్టుకుంటుందా? ఆర్జేడీ-కాంగ్రెస్తో కూడిన మహాకూటమి ఏమైనా మార్పు తెస్తుందా?... బిహార్ శాసనసభ ఎన్నికలకు ముందు రాజకీయ వర్గాల్లో చర్చనీయాంశమైన ప్రశ్నలివి. ఇలా ప్రధాన కూటములు, పార్టీల చుట్టూ తిరుగుతున్న పట్నా రాజకీయాల్లో తనదైన ముద్ర వేయాలని భావిస్తోంది హైదరాబాద్ ఎంపీ అసదుద్దీన్ ఓవైసీ నేతృత్వంలోని ఆల్ ఇండియా మజ్లిస్ ఎ ఇత్తెహాదుల్ ముస్లిమీన్ (ఏఐఎమ్ఐఎమ్).
పక్కా స్కెచ్..
బిహార్ అసెంబ్లీ ఎన్నికల్లో పోటీ చేస్తామని జూన్లోనే ప్రకటించారు ఓవైసీ. మొత్తం 32 స్థానాల్లో తమ అభ్యర్థులను బరిలోకి దించనున్నట్లు తెలిపారు.
రాష్ట్రంలోని సీమాంచల్పై ఓవైసీ దృష్టి సారించారు. ముఖ్యంగా రాష్ట్రీయ జనతాదళ్ (ఆర్జేడీ), కాంగ్రెస్ బలంగా ఉన్న ప్రాంతాల్లో గట్టి పోటీ ఇవ్వాలనుకుంటున్నారు. ముస్లింలు అత్యధికంగా ఉన్న అరారియా, క్రిష్ణగంజ్, పూర్ణియా, కటిహర్ ప్రాంతాల్లో ప్రత్యేక శ్రద్ధ చూపిస్తున్నారు ఓవైసీ.
గ్రేడ్లుగా...
ముస్లిం జనాభా ప్రాతిపదికన సీట్లను విభజించింది ఏఐఎమ్ఐఎమ్. ఏ-ప్లస్, ఏ, బీ గ్రేడ్లుగా వర్గీకరించింది.
ముస్లిం ఓటర్లు 32 శాతంగా ఉన్న నియోజకవర్గాలను ఏ- ప్లస్గా, 20-32 శాతం ఉన్నవాటిని ఏ గ్రేడ్గా, 15-20 శాతం ఉన్న వాటిని బీ గ్రేడ్గా విభజించారు. బీ గ్రేడ్ సీట్లు మొత్తం 16 ఉన్నాయి.
గట్టి పోటీ...
- 2019 అసెంబ్లీ ఉపఎన్నికల్లో క్రిష్ణగంజ్ స్థానాన్ని మజ్లిస్ పార్టీ అభ్యర్థి కామ్రుల్ హొడా గెలిచారు. బిహార్లో ఇదే మజ్లిస్ తొలి విజయం.
- 2019 లోక్సభ ఎన్నికల్లో ఏఐఎమ్ఐఎమ్ అభ్యర్థి అఖ్తరుల్ ఇమాన్.. ప్రస్తుత కాంగ్రెస్ ఎంపీ మహ్మద్ జావేద్కు గట్టి పోటీ ఇచ్చారు.
- 2015 అసెంబ్లీ ఎన్నికల్లో మొత్తం 6 స్థానాల్లో మజ్లిస్ పార్టీ పోటీ చేసినా గెలుపు దక్కలేదు.
సీమాంచల్ ప్రాంతంలో పార్టీ ప్రాబల్యం పెద్దగా లేకపోయినా లౌకిక, మైనార్టీ ఓట్లను చీల్చే అవకాశం ఉంది. తద్వారా రాష్ట్రంలో పార్టీని ఓవైసీ మరింత బలోపేతం చేయాలనే ఆలోచనలో ఉన్నారు.
